ნუცა ბუზალაძის ახალი სახლი საცურაო აუზითა და ფიტნეს-დარბაზით - ინტერვიუ მომღერალთან

თარიღი: 2018-11-29 11:57:27

ჩვენი რესპოდენტი ახალგაზრდა მომღერალი ნუცა ბუზალაძეა. ნუცამ დიდ წარმატებას იურმალას მუსიკალურ კონკურსზე მიაღწია, სადაც გამარჯვება მოიპოვა. შემდეგ კი, თავი თურქ მელომანებსაც დაამახსოვრა, როდესაც საერთაშორისო მუსიკალური სატელევიზიო ფორმატის, The Voice-ის თურქულ ვერსიაში მიიღო მონაწილეობა და შოუს ერთ-ერთ ფავორიტად იქცა.


ნუცა მშობლებთან ერთად ცხოვრობს, თუმცა რამდენიმე დღის წინ სოციალურ ქსელში დაწერა, რომ მან ახალი სახლი იყიდა, სადაც მალე დამოუკიდებლად საცხოვრებლად გადავა.

Home.ge: ნუცა, გილოცავთ ახალ სახლს! გვინდა, გაუზიარო Home.ge-ს მკითხველს ის კრიტერიუმები, რომელთა მიხედვითაც ახალი სახლის შეძენისას იხელმძღვანელე.
- კრიტერიუმები სხვადასხვა იყო. პირველ რიგში მინდოდა სახლს მაღალი ჭერი ჰქონოდა. მინდოდა სახლი დიდი სივრცით და გამწვანებული გარემოთი. ქალაქ გარეთაც ვფიქრობდი სახლის შეძენას, თუმცა საბოლოოდ, ისევ ქალაქში ცხოვრებაზე შევარჩიე არჩევანი.

Home.ge: ვინ გეხმარებოდათ სახლის შერჩევაში?
- რა თქმა უნდა, დედას ვეკითხებოდი რჩევებს. არ მინდოდა ქალაქის ცენტრში მქონოდა ბინა, ამიტომ ცოტა მყუდრო ადგილი შევარჩიე, თუმცა სად, ამას ვერ ვიტყვი. ერთი წელი ვეძებდი ბინას და ახლა ვნახე ეს სახლი. თბილისის ბინებში არ მომწონს დაბალი ჭერი, ამიტომ დიდ ხანს ვეძებდი ჩემს მოსაწონ ბინას. ჩემს სახლს საცურაო აუზი და ფიტნეს-დარბაზიც ექნება, რაც ძალიან მახარებს.

Home.ge: რაც შეეხება რემონტს, თავად ხართ ჩართული სარემონტო საქმიანობაში?
- ყველაფრის შერჩევის პროცესში ვარ ჩართული, ღია ფერებში იქნება გადაწყვეტილი ჩემი სახლი. მინდა როიალი დავდგა, უკვე შევიძინე მიკროფონი, რომელსაც თვლებს ვუკეთებ და სარეპეტიციოს მოვიწყობ სახლში. ჩემს სახლშიც ვაწყობდი რეპეტიციებს ჩემს ოთახში, ახლა კი ბევრად დიდი სარეპეტიციო მექნება.

Home.ge: არ გაგიჭირდებათ მარტო ცხოვრება?
- ვფიქრობ, ყველა ახალგაზრდამ უნდა სცადოს დამოუკიდებლად ცხოვრება, აქამდეც უნდა გადავსულიყავი მარტო. ეს სულ სხვა გამოცდილებას გაძლევს ადამიანს.

Home.ge: მზად ხართ თავი გაართვათ ყველა საოჯახო საქმეს, თუ დაიხმართ ვინმეს?
- ჩვენ გვყავს დამხმარე ქალი, რომელიც ჩემს სახლშიც ივლის და დედაჩემთანაც.

Home.ge წარმატებებს უსურვებს ნუცა ბუზალაძეს. მკითხველს კი შევახსენებთ, რომ ჩვენი საიტის მკითხველს კვირაში ერთხელ ვუზიარებთ ცნობილი ადამიანების გამოცდილებას უძრავი ქონების შერჩევასთან დაკავშირებით. თუ ჯერ არ წაგიკითხავთ, შეგიძლიათ ნახოთ, რა კრიტერიუმებით ხელმძღვანელობდნენ მომღერალი რატი დურგლიშვილი და მსახიობი სალომე შარვაძე ისეთი საპასუხისმგებლო ნაბიჯის გადადგმისას, როგორიც ბინის შეძენაა.