რატი დურგლიშვილი: კრიტერიუმები, რომლითაც ბინის შეძენისას ვიხელმძღვანელე

თარიღი: 2018-11-13 12:56:48

მომღერალი რატი დურგლიშვილი თბილისის ერთ-ერთ პრესტიჟულ უბანში, ვაკეში ცხოვრობს. სახლი ბანკის ვალით და მშობლების დახმარებით შეიძინა, რემონტი კი მეგობართან ერთად, თავად გააკეთა. 

რატი ამბობს, რომ რემონტის დროს, გამოუცდელობის გამო, ბევრი შეცდომა დაუშვა, რასაც დღეს ნანობს. 

Home.ge დაინტერესდა, რა იყო ის მთავარი კრიტერიუმები, რომლის მიხედვითაც ცნობილი მომღერალი ბინის შეძენისას ხელმძღვანელობდა.

რატი დურგლიშვილი: უკვე 7 წელია, რაც მარტო ვცხოვრობ. დიდი ვიყავი და ოჯახიდან გამოყოფის დრო იყო. ოჯახი ძალიან მიყვარს, მაგრამ მარტო ცხოვრებას სხვა ხიბლი აქვს, თუნდაც ის, რომ ახლა მაშინ ვიღვიძებ, როცა მინდა J  პირადი სივრცე უმნიშვნელოვანესია, განსაკუთრებით, ჩამოყალიბების პერიოდში.

იმ წელიწადს მე და მაკა ზამბახიძეს კარგი სამუშაო სეზონი გვქონდა, ბევრი კონცერტები იყო... უცებ გამოჩნდა ეს ბინა, რომელსაც ბანკი ყიდდა და შევიძინე. რაც შეეხება ბინის მდგომარეობას, მშენებლობა დასრულებული იყო, თუმცა იყო შავი კარკასი. ისე უცებ გადავწყვიტე ამ ბინის შეძენა, ვერ წარმოიდგენთ, მაგრამ ოჯახის და ბანკის დახმარების გარეშე ვერაფერს შევძლებდი. რემონტიც ბანკის ვალით გავაკეთე და დღემდე ვიხდი იმ სესხს. 

Home.ge:  რემონტის გაკეთება ვის მიანდე?

რატი დურგლიშვილი: მე თავად გავაკეთე ყველაფერი. დავდიოდი ელიავაზე მეგობართან ერთად და ვყიდულობდი ყველაფერს, რაც საჭირო იყო. ყველაფერი საკუთარი ხელით გავაკეთე, თუმცა ბევრი შეცდომა დავუშვი. არ გავაკეთე სახლის გენგეგმა და ამის გამო, რემონტისას კედელი ზუსტად იქ გავხვრიტეთ, სადაც წყლის მილი გადიოდა და შედეგად, მილი გასკდა.

ასევე, კედლების მუქ ფერებში შეღებვაზე შევაჩერე არჩევანი; ვიფიქრე, დიდი შუშაბანდი მაქვს და მაინც ნათელი სახლი მექნება-მეთქი, მაგრამ შევცდი. სიმეტრიულ კედლებზე გავაკეთე აქცენტი და ესეც აღარ მომწონს. ყველას ვურჩევ ეს შეცდომები არ დაუშვან. სახლი ნათელ ფერებში უნდა იყოს. 

Home.ge:  რატი, რამდენად დაინტერესდი ბინის შეძენისას ისეთი მნიშვნელოვანი პარამეტრებით, როგორიცაა სეისმომდგრადობა, სახანძრო უსაფრთხოება ან სხვა ნორმებით უსაფრთხო ცხოვრებისთვის?

რატი დურგლიშვილი: ლოგიკურად, უნდა დაინტერესდე როცა სახლს ყიდულობ მაგ ყველაფრით, განსაკუთრებით, სახანძრო სისტემით, თუმცა ასეთი წინდახედულობა სამწუხაროდ, არ გამომიჩენია. ამ კორპუსში ბევრი პრობლემა იყო, რომელსაც ნელ-ნელა ვაგვარებთ ერთობლივი ძალებით. მე პირადად, დამიწების პრობლემა მქონდა, მაგრამ გამოვასწორეთ. სახანძრო უსაფრთხოებაზე არ მიფიქრია, მაგრამ ალბათ, ეს სისტემა გამართულია.  

Home.ge: იმ კრიტერიუმებში, რომელთა მიხედვითაც შეარჩიე ბინა, იყო თუ არა კეთილმოწყობილი ეზო, ხედი...

რატი დურგლიშვილი: ეზოს მოყვარული მე არ ვარ და შესაბამისად, ამ არჩევანის გაკეთებისას კეთილმოწყობილი და დიდი ეზო არ ყოფილა მნიშვნელოვანი კრიტერიუმი. ჩემთვის ხედი ბევრად მნიშვნელოვანია. კარგი ხედი მაქვს და განსაკუთრებით ის მახარებს, რომ შენობის  ადგილმდებარეობიდან გამომდინარე, წინ კორპუსი ვერ აშენდება. 

Home.ge:  რაც შეეხება სარეკრეაციო სივრცეს, ბოლო პერიოდში უამრავი ადამიანი იმის მიხედვით ირჩევს ბინას, არის თუ არა საცხოვრებელი კორპუსის ირგვლივ რეკრეაციული ზონა. შენს შემთხვევაში იყო ეს მნიშვნელოვანი პარამეტრი სახლის შეძენისას?

რატი დურგლიშვილი: ამ მხრივ გამიმართლა. გარშემო არის პარკები, აქვეა ვაკის პარკიც. რაც შეეხება გამწვანებას, ამ თემის მიმართ ძალიან მგრძნობიარე ვარ. მეგობრებს ასეთი ტრადიცია გვაქვს, ყოველ დაბადების დღეზე ხეებს ვჩუქნით ერთმანეთს, შედეგად, ჩემს სახელზე ბორჯომის ტყეში 15 ხეა დარგული. აქტიურად ვმონაწილეობ ეკოსისტემის გაუმჯობესების ყველა პროცესში, რადგან ეს აუცილებელია ჩვენი ჯანმრთელობისთვის. 

Home.ge:  გიფიქრია ქალაქგარეთ ცხოვრებაზე? დღეისათვის სულ უფრო და უფრო პოპულარული და შეიძლება ითქვას, პრესტიჟულიც კი ხდება გარეუბნები, სადაც ქალაქისგან განსხვავებით, ეკოლოგიური მდგომარეობა ბევრად უკეთესია.

რატი დურგლიშვილი: ვერ წარმომიდგენია ქალაქგარეთ ცხოვრება, ზუსტად ვიცი, ვერ შევძლებ. ხალხი მიყვარს და ამით ვსაზრდოობ. შესაბამისად, ჩემთვის ქალაქში ცხოვრება ბევრად კომფორტულია.